విశ్వాస వాస్తవాలు - జీవన శ్వాసకోశాలు

విశ్వాస వాస్తవాలు - జీవన శ్వాసకోశాలు  

విశ్వాసం వాస్తవం కాకపోవచ్చు, కాని  

వాస్తవాన్ని విశ్వసించక తప్పదు

విశ్వాస వాస్తవం, వాస్తవ విశ్వాసం

ఉభయచరాలు; అభయహస్తాలు

కప్ప శ్వాస ధ్వని “బెక బెక బెక” రాగం  

ఏ ‘బెక’ ముందో వెనకో ఎవరికెరుక?

విశ్వాస వాస్తవాలు, వాస్తవ విశ్వాసాలు  

ఆమ్రేడితాలు, ఉభయపద ద్వందాలు

విశ్వాస వాస్తవాలు జీవన శ్వాసకోశాలు 

మనుషుల్లో కన్నా మానవేతర ప్రాణుల్లో అధికం

విశ్వాస రాహిత్యం, దుర్బలతకు చుట్టరికం   

నమ్మకం లేని జీవితం, విప్పి చెప్పలేని ప్రహేళిక

జవాబు లేని పొడుపుకథ, నక్షత్రం లేని రాత్రి

అర్థం లేని కథనం, గమ్యం లేని ప్రయాణం

బతుకుపైన, మనిషికి తనపైన తనకే లేని నమ్మకం.

విహంగం లేని పక్షి జీవితం, పాడైపోయిన గూడు    

శ్రద్ధ లేని ఆధ్యయనం, రాణించని వాణిజ్య వ్యావృత్తులు.

వాసనలేని విరికృత్రిమం, ఫలానికి నోచుకోని పుష్పం      

తోడేలు మచ్చిక, వెలయాలి ప్రతిన, వ్యాపారి సేవానిరతి

      ‘అభిలాష’, ‘అవసరం’ - విశ్వాసానికి మూల ప్రతీకలు      

అనంత శక్తి, అనిర్వచనీయ ప్రేరణ, అగణిత ప్రోద్బలం

మూగజీవికి స్వర రాగ తాన పల్లవిని నేర్పిస్తుంది

వికలాంగుల్ని హిమాయలయారోహాణం చేయిస్తుంది

మహాగిరులను సైతం కదిపి కుదిపే పవతాత్మజ శక్తి

మహోధధులను అంబరాల్ని చుంబించే చకితవైనం 

దావాగ్నులను శీతలీకరించే అనంతాద్భుత బలోపేతం     

సత్కార్యాలకి పునాది, అదృశ్యపు అదృష్టం,

అలతి నాదాల మిత్రశునకం, పరిపరిణామ తరుమొలక

అవసరాన ఆదుకునే సంకల్పం, ఎదురుచూసే వస్తుసారం

అతివిశ్వాసాల జీవనం – సంద్రంలో చిరు మరకల తుంపరలు

విశ్వాసవంతులు విశ్వవ్యాప్తులు , విజయపతాకధారులు

మానవజాతి విశ్వాసానికి – మహాసముద్రమే మహాసాక్షి.

తరచుగా భ్రమింపజేసే యాంత్రిక కళ ‘వాస్తవ’ ప్రక్రియ

ఆరోహణావరోహణలు కావించే ఎగుడుదిగుడుల నిచ్చెన

కదలికల మధ్య నడయాడే స్తబ్ధతలో జీయనయానం

ఊహలతో కప్పిపుచ్చే, సుదూరపు స్వప్నసాక్షాత్కారం

అసలు సిసలు వాస్తవాల్ని భరించలేని ఆధునిక మానవాళి

సమగ్ర, సంపూర్ణ, సత్య, నిత్య, సత్వర విశ్లేషణలకు నోచుకోనితనం

సత్యనిరోధం, స్వప్నలోక విహారం, వాస్తవాన్ని త్రోసిరాజనడమే

వాస్తవ విశ్లేషణకు శాస్త్రీయ శక్తిసూత్రాలు నిరుపయోగహారాలు

కవితలాగా  కలకాలం నిలవాలంటే సహజత్వం అనివార్యం

వాస్తవాన్ని కప్పిపుచ్చే ప్రగతి శీల ప్రవచనాలు, విప్లవపల్లవాలు

యిష్టాయిష్టాలకి స్వరూపాల్ని మార్చుకోలేని వాస్తవాలు

విలువలకి, తీర్పులకి, నేర్పులకీ, కూర్పులకీ అతీతాలు వాస్తవాలు

సిద్ధాంతాలు రాద్ధాంతాలు కావచ్చేమో ఎవరి కెరుక?

నవ్య భావాలకు ఒరవడి రగిలించే లక్షల వాస్తవాలకు

లక్ష్య లక్షణాలను ఆపాదించే ప్రక్రియ ప్రధానం

కళాదృష్టి, విజ్ఞానసృష్టి, సర్వసమ్మత త్రిగుణాత్మక సంగమ స్ఫూర్తిమంత

వాస్తవాలకు  సత్యయోగ సిద్ధ సాధ్యతలు జోడవాలి

వాస్తవాలని విలువైన వలువలుగా జీవధారణయోగ భరితమవ్వాలి

వాస్తవాలని విశ్వసించాలి, విశ్వాసాల్లోని వాస్తవాలని గ్రహించాలి.

         

              

మూడు ముక్కల తాను

మాటనుంచి మౌనం
మూగతనంలో శబ్దం
వెరసి సడిలేని సవ్వడి.

కూతురికి గొప్ప నిగ్రహం
జామాత ధశమగ్రహం
కోడలికి గ్రహచారం.

జీవితం జీతానికే

జీవితం మూడు అక్షరాలే
ముప్పేటలే, ముప్పుతిప్పలే
తిరిగిరాని ప్రాయం - అయినా అనివార్యం

జీవితంలో కష్టకాయం
నిజాయితీ, సంస్కారం
లక్షణ లక్ష్యం - అయినా అలక్ష్యం

జీవితంలో ప్రేమభావం
ఆత్మగౌరవం, స్నేహశీలత
అవిభాజ్యాలు  కాని అహంభావాలు

జీవితంలో ప్రశాంతత
ఆశాభావం, సత్యనిబద్ధత
కనీస విలువలు - కాని వేల వెలబోతలు

జీవితంలో దురాశ
గర్వభావం, క్రోధతత్వం
నరకానికి తరలింపు - కాని మూర్ఖపుతనాలే

జీవితం ఒక నిత్య పరీవాహం
ఒడ్డున నిలవడం వృధా - అలలతో కలసిపో సదా

జీవితం లో సంపద, కీర్తి
మట్టిపాలు - ప్రతిష్ట చిరంజీవి
వినా నిర్జీవి

జీవితంలో జీవనం, మరణం
మధ్యలో విరామం, విలాపం
వికాసం విషాదం, వినోదం వికారం
విలాసం వివాదం - విహారం విచారం
విన్యాసం విలయం
చివరకు విహంగం వీక్షణం

జీవితం జీవనమే
జీవించడమే, జీవింపజేయడమే

జీవితం ఆధ్యయనం
ఉపాదీకరణం, విరమణ
వ్రుత్తి, ప్రవృత్తి, నివృత్తి
చివరకు తోలుతిత్తి.

స్వీయ మానస దర్శనం
జీవితాంతం పోరాడి ఎట్టకేలకు
నీవనుకున్నది సాధించిన రోజు
ఈ ప్రపంచం ఒక్కరోజుకైనా నిన్ను
మకుటం లేని మహారాజును చేసిన రోజు
పొంగి పొరలకుండ అద్దం ముందు
నిలబడి స్వీయదర్శనం చేసుకో.
అద్దంలోని నీవైపు వీక్షిస్తున్న వ్యక్తి
నీతో గావించే మౌన సంభాషణం గమనించుకో.

నీజన్మకి కారణభూతం ఎవ్వరనుకున్నావు?
మాతాపితరులు, సహధర్మచారిణి నిమిత్తమాత్రులు
వీరెవరూ నిర్ణయకారులు కానే కారు
నీకు సమ్మతమైనా కాకున్నా
నీజీవితాన శిరోధార్యపు నిర్ణేత తీర్పులు
ఎవరివో కావు, నీముందు అభివ్యక్తింపచేసే వ్యక్తివే
నీ ముందున్న అద్దంలో కనిపించే అర్ధం కాని వ్యక్తివే.

ఆత్మసాక్షాత్కారం నీ వెనుకనుంచి అదృశ్యంగా
దర్శనీయం చేయించేది నీ ముందున్న అద్దంలోనివాడే

కొందరికి నీతిమంతుడివి
మరి కొందరికి నిజాతీయపరుడివి
యింకొందరికి అధ్బుత ఆశ్చర్యాల అజేయుడివి

ఈవన్నీ అగణితాలు సుమా! తస్మాత్! జాగ్రత్త!
ఎప్పుడో అప్పుడు డామిట్! కధ అడ్డం తిరుగుతుంది?
అద్దంలోని మిత్రుడివి నీవు అనర్హుడివి, అసమర్ధుడివి
అతని కళ్ళలో కళ్ళుంచి కలహంనుంచి జయించలేనివాడివి

నిన్ను మునగచెట్టెక్కించగల ముద్దుల నేస్తం
నీ అంతం సాంతం చవిచూసే అనంతం
క్లిష్టాతిక్లిష్టమైన ప్రమాదభరితం ఛేసినా చేస్తాడు
నీ చిరుజీవితాన్ని అతలాకుతలంగా మారుస్తాడు
నీ చుట్టూ మాయామోహపూరిత వలయాన్ని గిరిగీస్తాడు

చివరకు నీ ముందు చిరునవ్వులు చిందిస్తాడు
అంతిమ పర్వాన్ని శోకాతప్తభాధాగాధలతో ముంచెత్తుతాడు
తస్మాత్ జాగ్రత్త! పారాహుషార్! జాగ్తేరహో! అనుకోవాలి
కధ అడ్డం తిరక్క ఏమవుతుంది, దూరపు కంచికి పోతుంది
నీ అద్దంలోని మనిషి నిన్ను వెధవాయను చేయడం తధ్యం
నీ మనస్సాక్షి చేతిలో ఓటమి, ఆత్మసాక్షి పేరన పరాభవం.

అందుకే - మనవాళ్ళు ఒట్టి వెధవాయలోయి అన్నాడు డి గ్రేట్ గిరీశం.

మూడు ముక్కల తాను - హైకూలు

మూడు ముక్కల తాను - హైకూలు

పెనిమిటికి బిగుతు టై
ఆలి పెద్దమేడకు చిన్న నక్లెస్
వెరసి ఊపిరి పోతున్న సంసారం

చిన్నాడైనా పెద్దాడు
పెద్దాడి వెనుకే బుడత
ఎడం లేని హోదా సంసారం

కొడుకు వంశాకురం
కూతురు పాశామ్కురం
కోడలు హింసాంకురం

పరిపూర్ణ వ్యక్తిత్వం కోసం ప్రణాళికలు

పరిపూర్ణ వ్యక్తిత్వం

వ్యక్తి వేరు, వ్యక్తిత్వం వేరు
ఎక్కడో కాని సంగమం చేయవు
వ్యక్తి భౌతికం, వ్యక్తిత్వం అగమ్యగోచరం
దోందూ దోందే!
వ్యక్తిత్వమే లేనప్పుడు
పూర్ణం, పరిపూర్ణం
నిఘంటువు లో నానాపదాలే!
ఆలోచన తో పాటు ఆవేశం
ఆలోచన కన్న ముందే ఆవేశం
తెలుగువాడి తెగులుకి
తెలుగులోనే చెప్పగల నిర్వచనం

ఏమండి వ్యక్తీ గారూ
మీరు వ్యక్తిగానే వున్నారా
అయితే, సరిచుసుకోవాలి
సంగతుల గతులు యిలా ఉండాలి.

'నేను' చాయని పోనివ్వాలి
సహనానికి మారుపేరు మీది కావాలి
వాదాలని మనసారా తలధన్నాలి
గగన శిఖరం సులభం కాదని గ్రహించాలి
ఆకాశానికి నిచ్చెనలు విసరడం మనాలి
అప్రస్తుత ప్రసంగాలు అవధానాల్లోనే పరిమితమవ్వాలి
చేదు, వగరు కూడా ఆహా ఏమి రుచి అని లొట్ట వేయాలి
అతి సర్వత్ర వర్జయేత్ అన్నది ప్రయోగం చేయాలి
బాధ లేని బోధ గురువుగా ప్రభావితం కావాలి
మూర్క్హత్వం, మూసతనం మానుకోవాలి
గిరి గీయని సులభ మార్గాలని ఆచరించాలి
అనుమానం పెనుభూతమని గ్రహించాలి
అనర్ధ, అసమర్ధతలని అసమంజసాలని తెలుసుకోవాలి
దయ, సహనం, వినయం, వివేకం, మానం సంపదలవ్వాలి
వ్యవధి లేదని వ్యవస్థనే అస్తవ్యస్తం చేయడం మానుకోవాలి
వోదిగిపోతూ, ఎదిగిపోవడం ఎరుక చేసుకోవాలి
గమనంలో, ప్రస్థానంలో మీ ముద్రలే ముందుండాలి
కాంతి బీజాల్ని జోప్పిమ్చడంలో నిపుణత చూపాలి
జయాపజయాలని గణాంకాలతో గణనం మానుకోవాలి
విదురనీతుల పేరున అవినీతుల బూతుల్నివిసర్జిమ్చాలి
బలాన్ని చూసి మురిసిపోవక సరిగ్గా అంచనా వేసుకోవాలి
బలహీనతలని మరింత దుర్బలత గా తగ్గించుకోవాలి
అవామ్తరాల్ని అధిగామిమ్చుకోవడం నేర్చుకోవాలి
అవకాశాల్ని అద్భుత దేవతలుగా కొనియాడాలి
వీటిని సద్వినియోగం చేసుకున్న వాళ్ళు భాగ్యవంతులు
వీటిని దుర్వినియోగం చేసుకున్న వాళ్లు నిర్భాగ్యజీవులు.
అందుకే - జీవులు, నిర్జీవులు, మృతజీవులు
అందుకే - వ్యక్తులు, అవ్యక్తులు, అస్తవ్యస్త వ్యక్తులు
వ్యక్తావ్యక్తతను గ్రహించలేని దురవస్తకు బానిసలు
కృతయుగం నుంచి కలియుగానికి దిగాజారుడుతనాలు
పంకం ఊబిలో దిగిపోయి తేలలేకపోతున్న పద్మశ్రీలు
తెలుగుతనానికి, తెలుగుదనానికి తేడా తెలియనివాళ్లు
తెలుగుప్రజలు, తెగులుతో సతమతమవుతున్న రుజరణ సంకలనాలు
అప్రచురిత ప్రబంధాలు, వెలలేని వెలవెలబోతున్న నిశ్శబ్దపదప్రహేలికలు.

వానా వానా వల్లప్ప

వానా వానా వల్లప్ప తప్పట్లు తడిలో పిల్లకాయ పిడుగులు
నానా విధాల గోల చేష్టలు కేరింతలమయాలు మడుగడుగులు
మేనాడిస్తున్న మేళవింపులు మేటి చిరుజల్లుల ఆటపాటలు
నేనా నువ్వాలకు సరిసములు వర్షాకాలాన పిన్నల జలకాటాలు

(వానా - నానా - మేనా - నేనా, అన్న పదాలతో దత్తపది

విషయం - వానజల్లులో తడుస్తున్న పిల్లల అల్లరి గురించి.