తెలుగురధం.

భాషను వాహనాన్ని జోడించిన వైనం. తెలుగు కి వివరణ అనవసరం. రధం అంటే మనకు స్మరణకు వచ్చేది మన పవిత్రమైన పండుగ - రధ సప్తమి, రధాంక సప్తమి. సూర్యుడు ఆరాధనామూర్తి.
'జననీ త్వం హిలోకానం సప్తమీ సప్తసప్తికీ, సప్తవ్యాహృతికే దేవి నమస్తే సూర్యమాతృకే".
సప్తాశ్వములు గల ఓ సప్తమీ! నీవు సకలభూతములకును, లోకములకును, జననివి, సూర్యునికి తల్లివైన నీకు నమస్కారము। సూర్యారాధనం మనకు వేదకాలంనుండియే కలదు। "అసత్యేన రజసా వర్తమానో నివేశయ న్నమృతం మర్త్యం చ హిరణ్యయేన సవితా రధేనా దేవో యాతి భువనాని పశ్యణ్ - హిరణ్యరధమునెక్కి సూర్యుడు వెళ్ళుచున్నాడని ప్రాచీనులు ఎంతో సుందరముగ ఊహించి ఆరాధించారు। ఈ సూర్యుని రధానికి చక్రమొకటే। ఆ చక్రమునకు ఆకులారు; గుర్రములు ఏడు. సూర్యుడు సంవత్సరమునూ ఒకే చక్రముగల విశ్వమను రధమున ఛందస్సులను ఏడు గుర్రములను పూంచి వచ్చుచున్నాడు. సంవత్సరం ఆవృత్తమగు ఆరు ఋతువులు సముదాయం కనుక చక్రముగాను, సూర్యక్రణాన ఏడురంగులు భాసిస్తాయి కనుక వాని అశ్వములుగను పూర్వులు వర్ణించిరని పండితపరిశోధకుల భావన. రధం సంగతి అయింది.
యిక తెలుగు సంగతి।

'జనని సంస్కృతంబు సకల భాషలకును, దేశభాషందు తెలుసు లెస్స, జగతి తల్లికంటె సౌభాగ్యసంపదా అన్నాడు సాహిత్య చక్రవర్తి శ్రీనాధ మహాకవి।

'తెలుగదేల యన్న దేశంబు తెలు; గేను తెలుగువల్లభుండ తెలుగొ కండ, యెల్ల నృపులు గొలువ నెఋగవే బాసాడి, దేశభాషలందు తెలుగు లెస్స!' అని సామ్రాజ్య చక్రవర్తి అన్నాడు.
ఈ యిద్దరు మహానుభావులు అందించిన నుడి, నానుడిలను ఊపిరిగా, శ్వాశగా గ్రహించుకుని మన మాతృభాష తెలుగుని జనని, జన్మభూములతో సరిసమానంగా స్వీకరిస్తున్నాం అన్న భావన అత్యుక్తిగా భావించినా లేకపోయినా, అతిశయోక్తి ఎంతమాత్రం మాదు కాదు. తెలుగుదనానికి, తెలుగుదనానికి వారసులు రసరమ్య హృదయులైన నా తోటి తెలుగుతల్లి అనుంగు బిడ్డలకు సవినయంగా సమర్పించుకుంటున్న శతకోటి వందనాలు. మన జన్మభూమి, పుణ్యభూమి, ధన్యభూమి అయిన అమరభారతం - ఆంధ్రప్రదేశం - సుజల సుమధుర సుందరతరం. సత్యం, శివం, సుందరం. తెలుగుభాష అన్నా, తెలుగువారన్నా, తెలుగు సాహిత్యం అన్నా, సంస్కృతి అన్నా వల్లమాలిన అభిమానఏ ఈ - 'తెలుగు సంస్కృతి, సాహిత్య, సమగ్ర, సంక్షిప్త సంకలన విశ్వ వీక్షణ విహార దర్శినీ అయిన 'తెలుగురధం' ను ప్రతిశ్ఠాత్మకంగా మహాప్రస్థానం కావించాలని, ఈ ప్రస్థానంలో అందరి తెలుగువారి అండదండలతో చేయూతల్ని అందిస్తారని మనసా వాచా కర్మణా భావిస్తూ, విశ్వవిస్తూ, ఒక్కొక్క అడుగు ముందుకు వేయాలని కోరుకుంటూ -
మకర సంక్రమణ - సంక్రాంతి శుభకాంక్షలతో -

మీ కొంపెల్ల శర్మ